Oordenking - Spieëltjie, spieëltjie..

Liewe Vyfhoek-gelowige

Lees gerus hierdie oordenking.

Spieëltjie, spieëltjie..

God het die mens geskep as sy verteenwoordiger; as beeld van God het Hy die mens geskep, man en vrou her Hy hulle geskep. (Gen. 1:27)

Hoe sien jy jouself? Die manier waarop 'n mens na jouself kyk, is baie belangrik. Iemand kyk byvoorbeeld in 'n spieël na homself, en sê: "Kyk hoe lyk my hare, ek wou graag lang, raafswart hare gehad het. En my neus! Ek wou graag 'n netjiese, aristokratiese neus gehad het."

Ek en jy kan egter op 'n heel ander manier na onsself kyk. Jy is miskien nou wel nie die mooiste persoon in julle omgewing nie, maar as jy in God glo, is jy volgens die Bybel sy verteenwoordiger, sy beeld-draer.

Dis nie so maklik om te sê wat die Bybel presies bedoel wanneer daar staan dat ons God se verteenwoordiger en sy beeld is nie. Een ding is egter seker: dit beteken nie dat ons presies net soos God is nie. Ons lyk ook nie presies soos Hy nie. Dat daar egter iets van Hom in ons afgedruk is, kan niemand betwyfel nie. Hy is byvoorbeeld sondeloos, ewig en onbeperk — en dit is ons natuurlik nie. Ons het selfs die moontlikheid om anders te doen en te besluit as wat die Here graag wil hê. Die beste waarop ons kan hoop, is om iets van sy wese en sy heerlikheid te weerspieël in die manier waarop ons liefde, geduld, vergifnis, goedheid en trou openbaar.

Dit is nietemin van baie groot waarde dat ek en jy mag weet dat ons God se verteenwoordigers en sy beelddraers in die wêreld is. Sê vir jouself: "Jy is God se verteenwoordiger. Jy is God se beeld in hierdie wêreld. Tree dan so op!"

Dan kry jy sommer moed en waardering vir jouself. Nie omdat jy as so­danig iets besonders is nie, maar omdat God jou besonders gemaak het. Dit gee mens sommer 'n bietjie moed vir jouself, en dit laat jou met ander oë na jouself kyk.