Liewe Vyfhoek-gelowige
Lees gerus hierdie oordenking.
Jy kan werklik vry wees
"Eers as
die Seun julle vry maak, sal julle werklik vry wees." (Joh. 8:36)
As 'n Christen sy
sonde bely, vergewe die Here hom en dan is hy volkome vry. Dis 'n wonderlike Bybelse
waarheid wat ons elke Sondag in die erediens tydens die vryspraak hoor. Maar
dit is nie waaroor ek wil hê dat ons vandag sal dink nie.
Ongelukkig het
Christene ook somtyds dinge wat hulle nog steeds in 'n sekere sin bind. Dit het
dikwels niks met sonde te make nie. Dit is dinge soos humeurigheid, ongeduld
of 'n vinnige humeur. "Ek is nou maar so gemaak en laat staan," het
jy miskien ook al gesê. 'n Kind van God behoort nooit so te praat nie, want
dan maak hy die ruimte wat die Here Jesus vir horn kom skep het te klein.
Ons Meester
het immers nie net gekom om vir ons sonde te betaal en ons daarvan vry te maak
nie. Hy het gekom om ons hele lewe te verander. Jy self sukkel dalk al jare met
van die dinge wat ek nou net genoem het, of dalk soortgelyke goed. Neem 'n
slaggie jou lewe in oënskou. Wil jy regtig daarvan vry wees? Of aanvaar jy maar
jou "siekte" soos die man by die bad van Betesda?
Lê dit dan
vanmôre aan die voete van die Man van Nasaret, en begin hierdie dag as 'n
werklike vry mens. Onthou: vryheid en blydskap, 'n glimlag en opgewondenheid is
dinge wat ander mense beïnvloed. As jy in daardie vryheid begin lewe, sal jy
vandag 'n soutpotjie in die gemeenskap wees; 'n stad op 'n berg en 'n lig vir
die wêreld. Dis binne jou vermoë om vanaand op hierdie dag te kan terugkyk en
te kan sê: "Ek laat vandag hierdie wêreld ‘n bietjie beter agter as wat
ek vanmôre daarin begin het.
