Oordenking - "n Getuie op jou siekbed

Liewe Vyfhoek-gelowige

Lees gerus hierdie oordenking.

‘n Getuie op jou siekbed

Toe Jesus dit hoor, het Hy gesê: “Hierdie siekte sal nie op die dood uitloop nie, maar op die openbaring van die wonderbaarlike mag van God, sodat die Seun van God daardeur verheerlik kan word.” (Joh 11:3)

Siekte is een van die dinge wat spanning die hoogte kan laat inskiet. Veral as jy bekommerd is dat die simptome wat jy op die oomblik ondervind dalk maar net die punt van die ysberg is.

As Maria en Marta se broer, Lasarus, ernstig siek word, is die eerste ding wat hulle doen om vir Jesus daarvan te laat weet. Maar wat doen Jesus? In plaas daarvan dat Hy sy vriende te hulp snel, wag Hy totdat Lasarus reeds vier dae dood is, voordat Hy by Marta en Maria se huis in Betanië opdaag. Ek is seker dat die twee susters die baie moeilik gevind het om hierdie onverstaanbare optrede van die Jesus te verwerk. Hulle het goed geweet dat Hy hulle liefhet, en tog laat Hy toe dat hulle broer sterf sonder dat Hy ‘n vinger verroer om te help.

Maar Jesus het ‘n goddelike doel hiermee gehad: deur Lasarus se dood wil Hy sy mag oor die dood bevestig. So sou Hy aan God baie meer eer gee as wanneer Hy hom net gesond sou maak.

Soms bring die Here siekte en dood oor jou pad. Dinge wat jou stresvlak verhoog, onverstaanbare dinge wat jy met jou menslike verstand nie kan verwerk of begryp nie. Maar as jy ten spyte van hierdie dinge in jou lewe dit kan regkry om op God te bly hoop, om Hom onvoorwaardelik te vertrou, sal Hy ook in jou siekte en seerkry sy mag openbaar, sodat die mense wat jou sien, versterk sal word en Hom sal verheerlik. So kan jy selfs op jou siekbed ‘n stralende getuie van sy heerlikheid wees. Sal jy probeer om dit te doen?

Oordenking - As jy 'n dierbare verloor het

Liewe Vyfhoek-gelowige

Lees gerus hierdie oordenking.

As jy ‘n dierbare verloor het

Die koning het ontroerd geraak en in die kamer bokant die poort opgeklim. Daar het hy heen en weer geloop en gesê: “My seun Absalom, my seun, my seun, ag as ek maar in jou plek kon gesterwe het. Absalom, my seun, my seun.." (Job 30:15, 16)

Alhoewel Dawid eintlik verlig moes gewees het oor die dood van hierdie seun wat hom wou doodmaak, oorweldig die smart hom wanneer hy van Absalom se dood hoor. Hy is so hartseer hieroor dat hy selfs in die plek van sy seun sou wou sterf.

Wanneer ‘n mens iemand verloor wat vir jou baie kosbaar is, veroorsaak dit ‘n totale omwenteling in jou lewe. “Mens kan nooit die dood van jou kind verwerk nie,” vertel een van  my vriende wat sy enigste seun in ‘n fratsongeluk verloor het. “Dit bly elke dag vir jou ‘n nuwe verskrikking.”

As jy in so ‘n krisissituasie is, moet jy besef dat jy vir God broodnodig het. God is altyd daar wanneer jou pyn te veel word. Hy wil graag vir jou ‘n trooster wees. Maar jy het ook ander mense in jou lewe nodig. Mense wat jou kan bemoedig, en mense teenoor wie jy kan uitpraat, want die beste medisyne vir jou verlies is juis om te praat oor die persoon wat jy verloor het. Eers wanneer jy jou seerkry in woorde omgesit het, sal jy kan begin om daardie verlies te verwerk en uiteindelik te aanvaar. Die aanvaar van die onomstootlike van wat gebeur het, is die begin van die troos.

Oordenking - God is groter as jou depressie

Liewe Vyfhoek-gelowige

Lees gerus hierdie oordenking.

God is groter as jou depressie

"…ek word deur angs oorval; my aansien het soos wind weggewaai, my hoop op uitkoms het soos ‘n wolk verdwyn. Nou is daar geen hoop meer vir my nie, ondergang staar my elke dag in die gesig." (Job 30:15, 16)

Mense wat aan depressie ly, ervaar ‘n verlies van menswaardigheid en hoop. Hulle glo nie dat geluk ooit weer vir hulle beskore is nie. Ons teksvers is ‘n pragtige beskrywing van die ervaring van ‘n depressielyer. Of dit nie erg genoeg is nie, voel dit ook nog vir jou of God nie meer dieselfde is nie. Of jou dringende gebede onbeantwoord bly, aldus Job.

Job het alles verloor wat vir hom dierbaar was: sy kinders, sy gesondheid, sy besittings, sy vriende. Dit voel vir hom of daar niks oorgebly het nie. Boonop kan hy nie verstaan waarom God hom so bykom nie, want in Job se oë het hy niks verkeerd gedoen nie. Dis eers wanneer God self met Job in gesprek tree, wanneer Hy vir Job wys hoe groot en almagtig Hy is, dat Job sy onmag besef. Nou weet hy dat God Hom niks skuld nie (Job 42:3, 5, 6).

Wanneer Job besef hoe magtig God is, bely hy sy sonde, en God luister na hom. Hy seën vir Job selfs meer as aan die begin. Miskien lê die oplossing van jou eie probleem ook hier. Dat jy jou eie nietigheid teenoor God se almag sal ontdek en Hom vra om jou depressie te lig. (Onthou net dat depressie wat voortduur deur mediese hulp behandel moet word.)