Oordenking - Met Christus die toekoms in

Liewe Vyfhoek-gelowige

Lees gerus hierdie oordenking en bepeins die vraag aan die einde.

MET CHRISTUS DIE TOEKOMS IN

Jesus Christus is gister en vandag dieselfde en tot in ewigheid (Heb 13:8)

Die onveranderlike Christus bring stabiliteit in die lewe van sy kinders. Dit gebeur selde dat die lewe glad en sonder probleme verloop. Soms gaan alles goed; dan skielik, sonder enige verklaarbare rede, duik pro­bleme op. Die een oomblik ry jy op die hoogtes van uitbundige blydskap en net die volgende oomblik strompel jy deur die donker vallei van wanhoop.

Jy fluktueer gedurig tussen die pole van hoop en wanhoop; van vreugde en droefheid. Daarom het jy 'n stabiliserende invloed in jou lewe nodig — die lewende Christus.

Christus is ewig en Hy verander nooit nie. Al is 'n mens temperamen­teel en al wissel jou gevoelens volgens die omstandighede waarin jy verkeer, ondervind jy 'n ongekende standvastigheid as Christus die Ko­ning en Here van jou lewe is en sy Heilige Gees in jou woon.

Jy word nie meer deur elke stormwind rondgeslinger nie. Daarmee saam kom 'n lewensvreugde so groot dat dit nie onder woorde gebring kan word nie. Aan sy liefdevolle hand gaan jy die toekoms moedig en selfversekerd tegemoet.

Preek - 22 Julie Ds. Eljam - Die krag van 'n saadjie

Oordenking -Reik na Goud

Liewe Vyfhoek-gelowige

Lees gerus hierdie oordenking.

REIK NA GOUD

In die goeie wedloop van die geloof moet jy al jou kragte inspan en die ewige lewe as prys behaal (1 Tim 6:12)

“Reik na Goud” was die leuse van die Amerikaanse span by die Olimpiese Spele van 1984. Net die beste sou vir hulle goed genoeg wees.

Elke mens het die begeerte om sukses te bereik. Niemand wil graag misluk nie. Waarom is daar dan soveel wat misluk?

Dis verbasend hoeveel mense sonder 'n lewensdoel voortdryf. Omdat hulle niks van die lewe verwag nie, gee die lewe aan hulle niks terug nie.

Daar is ook mense wat mooi ideale koester, maar wat van meet of aan hulleself oortuig dat hulle dit nie kan bereik nie. Hulle kla dan later dat hulle nooit die geleentheid gehad het nie, terwyl hulle in werklikheid net nie volhard het nie.

Sukses is nie die bereiking van 'n brandende ambisie nie, maar eer­der 'n diepe bevrediging in die strewe na 'n waardige doel. Daar is mense wat alles bereik het wat die wêreld hulle kan bied, maar tog diep ongelukkig is, omdat hulle soek na iets wat aardse skatte hulle nie kan gee nie.

Daarom wys Paulus vir Timoteus op “die goeie stryd van die geloof” en die ideaal van “die ewige lewe” — dit is die goud van die lewe. Stel gedurig jou mikpunt vorentoe en opwaarts, sodat jy 'n geestelike peil kan bereik waar jy so totaal aan God oorgegee is, dat Hy sy doel met jou lewe kan bereik.

Ek dank U, my Verlosser, dat my sukses nie van die wêreld afhang nie, maar van die mate waarin ek my aan u Heilige Gees oorgee.

Preek - 8 Julie - Ds. Hansie - Die deur na God toe is vir ons oop

Preek - Die deur na God toe is vir ons oop

Preek - 1 Julie - Ds. Hansie - Lewe as mense van die lig

Preek - Lewe as mense van die lig