Oordenking - My hoogste oogmerk

Liewe Vyfhoek-gelowige

Lees gerus hierdie oordenking.

My hoogste oogmerk

Nee, beywer julle allereers vir die koninkryk van God en vir die wil van God, dan sal Hy julle ook al hierdie dinge gee. (Matt. 6:33)

Hoe groot is jy in jou eie oë? In hoe 'n mate word jou gedagtes heeltemal opgeneem deur slegte dinge wat in die verlede gebeur het? Waaraan spandeer jy die meeste tyd?

Die grootste Leermeester van alle tye sê dat ons hoogste prioriteit die koninkryk van God en die wil van God moet wees. Wanneer God die eerste plek in 'n mens se lewe inneem, beteken dit dat jy eerste na Hom sal gaan as jy hulp nodig het. Dan sal sy wil voortdurend in jou gedagtes wees. Sy liefde en genade sal vir jou tot voorbeeld wees. Jy sal Hom in alles dien en in alles aan Hom gehoorsaam wil wees.

Wat is regtig vir jou belangrik? Mense, materiële dinge, behoeftes en begeertes is alles besig om vir die belangrikste plek in jou lewe te wedywer. As jy nie doelbewus vir God die eerste plek op elke terrein van jou lewe gee nie, gaan dit vir enige van die ander dinge maklik wees om Hom van sy ereplek te beroof.

Kom ons doen 'n eenvoudige eksperiment. Ek dink jy sal met my saam­stem dat God, jou werk en jou gesin die belangrikste prioriteite op jou ly­sie is — in daardie volgorde. Maar nou wil ek jou 'n belangrike vraag vra: Hoeveel tyd spandeer jy aan elkeen van daardie drie? Tydgewys is dit waarskynlik presies die omgekeerde: gesin, werk, God. Dit is natuurlik nie heeltemal so eenvoudig nie, want ook 'n mens se werk en gesin is deel van God se plan vir jou lewe. En tog gee dit jou 'n aanduiding van hoe die prioriteite en jou tyd dikwels nie met mekaar klop nie.

Vandag sal jy weer geleentheid kry om jou tyd en jou energie te spandeer soos jy wil. Wil jy nie die raadgewing van die grootste Leermeester van alle tye volg nie?

Oordenking - Hou moed en wees dapper

Liewe Vyfhoek-gelowige

Lees gerus hierdie oordenking.

Hou moed en wees dapper

Hou moed en wees dapper! Moenie bang wees nie, moenie vir hulle skrik nie, want die Here julle God gaan saam met julle. Hy sal julle nie in die steek laat nie, julle nie alleen laat nie. (Deut. 31:6)

Israel het baie herinneringe, ondervindinge en lesse gehad wat hulle op die pad tussen Egipte en die beloofde land met hulle saamgedra het. Almal daarvan was nie altyd so aangenaam en positief nie. Dieselfde geld vir jou en vir my. Sommige van ons het self 'n veelbewoë verlede gehad. 'n Mens word soms eintlik opnuut weer bang as jy daaraan terugdink.

Dieselfde geld egter ten opsigte van die toekoms. Toe hulle aan die groot taak wat vir hulle voorgelê het, gedink het, het die Israeliete seker by tye gebewe van angs. Onsekerheid maak 'n mens mos bang. Dis veral wanneer jy weet dat daar groot gevare op die pad vorentoe wag, dat 'n mens bang en onseker word. Dit is in sulke tye dat ek en jy — net soos die Israeliete destyds — graag die versekering wil hê dat die Here by jou is.

Dit is presies hierdie versekering wat Moses nou as mondstuk van die Here vir die Israeliete gee. Hy sê dat hulle kan moedhou en dapper wees. Hulle hoef nie bang te wees of te skrik nie, want die Here gaan saam met hulle. Hy sal hulle nooit in die steek laat nie. Aan die hand van die Here glimlag die toekoms mos vir 'n mens. Dan sien jy sommer kans om groot storms te trotseer en berge uit te klim as dit moet. Is dit nie waar nie?

Wat is die dinge wat jou bangmaak en jou jou moed ontneem? Wie is die mense wat vir jou 'n bedreiging is? Moenie dat jou verlede Of die toe­koms langer vir jou soos 'n meulsteen om jou nek bly hang nie. Die Here is mos by sy kinders. Hy sal jou ook nie in die steek laat nie. Hou dus vas aan die beloftes in sy Woord! Eis die versekering van sy teenwoordigheid waarvan Hy ons op so baie plekke verseker, vandag opnuut vir jou persoon­lik op met die oog op môre.

Oordenking - Jou hart en jou lewenskoers

Liewe Vyfhoek-gelowige

Lees gerus hierdie oordenking.

Jou hart en jou lewenskoers

Wees veral versigtig met wat in jou hart omgaan, want dit bepaal jou hele lewe. (Spr. 4:23)

In 'n sekere sin bepaal 'n mens self jou toekoms. Oor dit wat agter lê, het jy geen beheer nie. Jy is egter wel in staat om besluite te neem wat in 'n groot mate jou lewensrigting sal bepaal. Daarom dat die Bybel sê ons moet versigtig wees met wat in ons hart omgaan, want uiteindelik is dit deurslaggewend vir ons lewensrigting.

Ons emosies — ons gevoelens van liefde en begeerte — bepaal in 'n groot mate hoe ons lewe. Daarom dat 'n mens altyd kan tyd maak vir din­ge waarvan jy hou en wat jy begeer. In die gedeelte sê die skrywer vir ons dat dit nodig is om ons emosies onder beheer te hou en te konsentreer op begeertes wat ons sal help om op die regte pad te bly.

Maak seker dat jou emosies jou in die regte rigting stuur. Beheer jou begeertes en moenie alles wat jy sien, probeer verkry nie. Kyk reguit voor jou en hou jou oë op jou eindbestemming gevestig. Dit bepaal jou lewens­koers. Dink maar net aan 'n kind of jongmens; die een in wie se hart 'n droom van sukses lewe, gaan waarskynlik sy droom verwesenlik. Die een wat geen droom in sy hart troetel nie, het nie 'n goeie kans om dit ver te bring in die lewe nie.

Onthou dat jy vandag in 'n posisie is as gevolg van besluite wat jy gis­ter geneem het, of nie geneem het nie. Net so sal jy môre in 'n situasie wees op grond van besluite wat jy vandag neem — of nie neem nie. Daarom dat dit so belangrik is dat 'n mens sal sorg dra van wat in jou hart omgaan. Daar is sekere gedagtes wat jy moet uitskakel sodra dit by jou opkom, en ander gedagtes wat jy moet troetel omdat dit 'n positiewe uitwerking op jou toekoms kan hê.