Oordenking - DIE DOODLYN IS NOU OOK DIE DOELLYN

Liewe Vyfhoek-gelowige

Lees gerus hierdie oordenking en bepeins die vraag aan die einde.

DIE DOODLYN IS NOU OOK DIE DOELLYN

Toe ek Hom sien, het ek by sy voete neergeval en bly lê soos een wat dood is. Hy het toe met sy regterhand aan my gevat en vir my gesê: “Moenie bang wees nie, dit is Ek, die Eerste en die Laaste,die Lewende. Ek was dood en, kyk, Ek lewe tot in alle ewigheid; en Ek het die sleutels van die dood en die doderyk” (Openb 1:17-18).

Die dood regeer met 'n ystersepter oor ons almal se lewe. Dit is skoppens­boer, die een wat die heel laaste lag. So dink die meeste mense. Maar vol­gens die Nuwe Testament het Jesus die dood 'n finale uitklophou op Golgota kom toedien deur binne in sy kloue in te stap en drie dae later lewend aan die ander kant uit te kom. Omdat Hy God is, het Hy sonder veel seremonie oor hierdie magtige vyand getriomfeer.

Jesus se oorwinning hou wonderlike nuus vir ons in. Ons wat Hom ken, mag nou ook saam met Hom deel in sy vernietiging van die heel laas­te vyand. Ons toekoms is veilig; so veilig dat Johannes selfs in Openbaring 14 'n hemelse stem hoor wat vir hom sê om neer te skryf dat mense wat in Christus glo, regtig geseënd is as hulle die dag tot sterwe kom, want dan breek hulle rustyd aan. Dan is hulle klaar met hulle aardse stryd teen die sonde, en dan is dinge soos hartseer en eensaamheid vir altyd verby.

Dit is fantasties om te weet dat God self sê dat gelowiges wat uiteindelik by die dood aankom sommer baie gelukkig is. Die dood is nou ons wenpaal, ons gradeplegtigheid. Hier ontvang ons ons nuwe spierwit feesklere vir die hemelse feesmaal. Terwyl ons hier op aarde treur oor ons geliefdes wat ons aan die dood moet afstaan, is God egter verheug oor al sy kinders wat by Hom in sy hemelse troonsaal aankom. Ons moet daarom leer om deur ons hartseer heen te kyk na Hom wat die mag het om mense wat dood is weer lewend te maak.

Die feit dat ons die Een dien wat die sleutels van die dood en die dode­ryk vashou, moet ons ook met hemelse vreugde vul terwyl ons onderweg is na ons eie wenpaal; na ons woonplek by God.