Oordenking - GESEËND IS JY AS JY NIE LANGER ‘N KLOP OP DIE SKOUER WIL HÊ NIE

Liewe Vyfhoek-gelowige

Lees gerus hierdie oordenking en bepeins die vraag aan die einde.

GESEËND IS JY AS JY NIE LANGER ‘N KLOP OP DIE SKOUER WIL HÊ  NIE  

"... as julle alles gedoen het wat aan julle opgedra is, sê dan: Ons is sla­we wat niks verdien nie. Ons het gedoen wat ons verplig was om te doen." (Luk. 17:10)

Dit is nou maar eenmaal moeilik om dienaars te wees. Ons is immers selfsugtige wesens wat altyd net die beste vir onsself wil hê. In die geheim dink ons almal dat die heelal eintlik net om ons draai. Daarom vra dit 'n Goddelike ingrype om ons van onsself te verlos. Dit vra dat ons elke dag na die Here sal opkyk om ons te bevry van selfsug en eiegeregtigheid.

Jesus sê in Lukas 17 dat ons moet besef dat om 'n Christen te wees baie meer om die lyf het as om net maar 'n paar godsdienstige dinge te doen. Dit vra dat ons sal besef dat ons die beheer oor ons lewe aan God af­geteken het. Ons is sy slawe. En natuurlik moet ons verstaan wat 'n slaaf is ten einde hierdie woorde van Jesus na behore te verstaan.

In die Bybelse tyd kon ryk mense vir hulleself mense op die markplein gaan koop om hulle te bedien. Sulke mense, wat as slawe bekendgestaan het, het dan die lewenslange eiendom van hul nuwe eienaars geword. Jesus sê dat God vir ons wat in Hom glo op 'n goeie dag op die markplein van die sonde kom koop het. Ons is daarom sy eiendom en moet doen wat Hy van ons vra. Ons verkeer nie in 'n posisie om self die voorwaardes neer te lê oor hoe ons God wil navolg nie. Nee, ons moet Hom op sy voor­waardes volg, of wegbly.

As gelowiges moet ons alles doen wat God van ons vra sonder om eni­ge beloning of 'n klop op die skouer van God of ander te verwag. Ons is immers nie in God se diens om aangeprys te word nie. Nee, ons is sy diensknegte, sy slawe wat dag en nag slegs een doel voor oë het, en dit is om sy wil uit te voer. Daarom moet ons maar ons kroon 'n slag afhaal en weer God se diensknegklere aantrek.