Oordenking - Versprei die aangenaamste geur

Liewe Vyfhoek-gelowige

Lees gerus hierdie oordenking.

Versprei die aangenaamste geur

Maar aan God die dank! Hy voer ons altyd saam in sy triomftog omdat ons een is met Christus. Deur ons versprei Hy die kennis van Christus oral soos 'n aangename geur. (2 Kor. 2:14)

As die atmosfeer in 'n kamer of huis muf is, gebruik ons lugverfrissers. Volgens Paulus is die kennis van Christus 'n aangename geur in die wêreld. En wat meer is: God wil die kennis van Christus deur ons versprei.

'n Mens se omstandighede vorm jou in 'n groot mate. Dit bepaal die manier waarop jy na jouself kyk, die manier waarop jou persoonlikheid ontwikkel en die styl waarop jy situasies gaan hanteer. Uiteindelik sal 'n mens egter nie omstandighede of ander mense kan blameer vir die manier waarop jy optree en lewe nie. Jy het self 'n verantwoordelikheid.

Om die waarheid te sê, jy het nie net 'n verantwoordelikheid teenoor jouself nie. Soos lugverfrissers is ek en jy instrumente in God se hand om ons omgewing te beïnvloed. Deur ons versprei Hy die kennis van Christus oral soos 'n aangename geur.

Dit hou in dat ek en jy nie in onsself gekeer behoort te wees nie. Ons moet die oop kanale na buite wees deur wie die vars reuk van die evangelie die omgewing kan bereik. Hoe vereer die Here ons tog deur ons so te wil gebruik! En wat 'n groot verantwoordelikheid plaas dit op jou en my. In 'n sekere sin is ons die vertoonvensters van die Heilige Gees in die wêreld. God se goed word in die vensters van ons lewe vir wêreldlinge uitgestal om na te kyk.

Moet dan nie in hierdie dag so groot voor mense staan dat hulle nie die Here kan sien nie. Moenie die lig op jouself trek of op jou eie verlede nie, maar versprei die reuk van die evangelie teenoor almal met wie jy vandag in aanraking gaan kom. Moenie dat die mufheid van jou eie verlede oorwaai en die hele atmosfeer belemmer nie. Wees 'n lugverfrisser.

Oordenking - Luister na die stem agter jou

Liewe Vyfhoek-gelowige

Lees gerus hierdie oordenking.

Luister na die stem agter jou

Wanneer jy die regte koers verlaat, sal jy agter jou 'n stem hoor sê: "Hier is die pad, loop hierlangs." (Jes. 30:21)

Jy het waarskynlik ook al die ervaring gehad dat iemand se naam skielik baie helder in jou gedagtes opkom. Dis of 'n mens 'n gedrongenheid ervaar om daardie persoon te besoek. In die geroesemoes van die dag waai die naam egter weer by die venter uit, en jy kom nooit by daardie persoon uit nie. Ek het net hierdie week weer so 'n ervaring gehad, maar toe nooit by die betrokke persoon uitgekom nie. Gister loop ek horn raak, en sê toe ewe skuldig: "Ek het gister so baie aan jou gedink, maar toe nooit daar uitgekom nie."

"Dis jammer," antwoord hy, "ek het regtig 'n behoefte daaraan gehad. Die groot, donker hand uit my verlede het my weer stewig in sy greep ge­had!"

Wat ons nie besef nie, is dat die Heilige Gees soms so met ons werk. Wees dus sensitief vir die leiding van die Heilige Gees in jou lewe. Sorg dat die antenna van jou gees fyn ingestel bly op die hemelse sendstasie van die Heilige Gees. Luister dan na die influisteringe van die Gees sodat jou persoonlikheid al meer die van die Here Jesus sal word. Laat toe dat die Heilige Gees sy salwing op die wonde van jou verlede uitgiet, sodat jou môres anders kan wees as jou gisters. Gehoorsaam Hom wanneer Hy op 'n sagte manier 'n opdrag in jou gedagtes en hart lê.

Hoe meer jy jouself oopstel vir die werking van die Gees van God, na sy stem luister en Hom gehoorsaam, hoe duideliker sal die beeld van die Here Jesus terselfdertyd in jou lewe sigbaar word.

Oordenking - Tot die môrester opkom in jou hart

Liewe Vyfhoek-gelowige

Lees gerus hierdie oordenking.

Tot die môrester opkom in jou hart

Hierdie boodskap is soos 'n lamp wat in 'n donker plek skyn. Julle sal goed doen as julle in sy lig bly totdat die dag aanbreek en die môrester opkom in julle harte. (2 Pet. 1:19)

O, daar is vir seker baie dinge in jou en my lewe wat ons nie regtig ver­staan nie. Hoekom gebeur slegte dinge met my? Hoekom was daar al so­veel hartseer in my lewe? Waarom moes ek 'n dierbare aan die dood af­gee? Al hierdie dinge het soms 'n uitwerking op my hele persoonlikheid. Uiteindelik word ek 'n mens wat krom loop vanweë al die vraagtekens wat op my skouers rus. Gelukkig is dit so dat die Bybel op sommige van hierdie vrae duidelike antwoorde gee. Op ander kry ons egter nooit 'n klinkklare antwoord nie. Ons kan egter in vertroue voortgaan omdat ons weet dat ons uiteindelik al die antwoorde op ons baie vrae by die Here sal vind. Dan sal al die vraagtekens ook verander word in uitroeptekens.

Ek ken baie Christene in wie se hart die helder lig van God se boodskap dof is vanweë laste en vraagtekens. Petrus skryf in ons teksgedeelte dat die boodskap soos 'n lamp is wat in 'n donker plek skyn. Daar is dus geen rede dat selfs swaarkry en probleme jou gemoedstoestand hoef te verdonker nie. Die vraag is nou: Wat doen ek en jy wanneer dit soms wel gebeur dat dit skemer — en soms selfs donker — word in ons hart?

Totdat Jesus Christus, God se Lig vir die wêreld, self terugkeer en ons met ons verheerlikte liggaam by Hom sal wees, is die Bybel die lig wat God vir ons lewenspad gee. Aanvaar dan ook die dinge waarop jy nie ant­woorde kry nie. Wees tevrede met die dinge wat jy nie kan verander nie. Lewe in die lig van God se Woord totdat die dag aanbreek en die môrester finaal opkom in jou hart.

Oordenking - Wysheid sonder verwyt

Liewe Vyfhoek-gelowige

Lees gerus hierdie oordenking.

Wysheid sonder verwyt

As een van julle wysheid kortkom, moet hy dit van God bid, en Hy sal dit aan hom gee, want God gee aan almal sonder voorbehoud en sonder verwyt. (Jak. 1:5)

Geestelike rypheid van die geloof is nie 'n toestand wat eens en vir altyd bereik word nie. Dit is 'n proses van slyping en toetsing. So kan dit dan ook gebeur dat iemand op 'n gegewe oomblik geen raad meer weet nie. Hierdie insig ("wysheid") midde-in konkrete lewensomstandighede waar beslissinge geneem moet word, kan van God afgebid word.

Jakobus voeg egter op 'n verrassende manier daarby dat God dit dan sonder voorbehoud of verwyt sal voorsien. Dit gaan dus duidelik oor geeste­like insig, wat 'n gawe van God is, en wat tot beskikking van sy kinders is. Dit help ons om die regte besluite te neem, en dit verhoed dat ons sal te­rugval in die dwaashede waarin die onwedergebore mens sy vreugde vind.

Wysheid beteken die vermoë om te weet hoe God wil hê dat jy jou lewe moet inrig, en hoe jy in elke konkrete situasie moet optree. Hierdie wysheid is geen natuurlike wysheid wat 'n mens sommer vanself het, of uit boeke of by mense kan leer nie. Jy het dit net as jy God in gebed daar­voor vra, en Hy gee dit aan jou deur die Heilige Gees.

Dit is mos ook God wat deur sy Gees in jou woon, en Hy lei jou in die volle waarheid. Die wysheid wat die Gees aan 'n mens gee, verander nie net jou uitkyk op die lewe nie, maar ook jou hele lewenswyse. Dit sal dan ook uit 'n mens se daaglikse optrede blyk of jy hierdie wysheid het, en of jy dit elke dag konkreet toepas.

'n Mens het ook soms baie wysheid nodig as jy van lewensrigting wil verander. Die verlede hou jou soms soos 'n magneet vas, sodat jy nie jou­self uit daardie kragveld kan losruk nie. Dit is dan dat 'n mens besef jy kort wysheid. Bid dit dan van die Here, want Hy gee wysheid sonder ver­wyt.

Oordenking - Wat maak jy hier?

Liewe Vyfhoek-gelowige

Lees gerus hierdie oordenking.

“Wat maak jy hier?”

"Wat maak jy hier Elia?" (1 Kon. 19:13)

Daar was 'n oomblik in die profeet Elia se omswerwinge dat hy uit vrees vir sy lewe moes vlug voor die goddelose koningin Isebel. Net soos vir Adam en Eva, het die Here egter sy profeet opgesoek. "Wat maak jy hier, Elia?" vra die Here vir horn waar Hy Elia in die grot besoek. Dit is wonderlik dat ons God ons opsoek in tye wanneer ons wil wegkruip of wanneer ge­beurtenisse uit ons verlede ons uitsig op Hom belemmer.

So is daar dan ook vir die meeste van God se kinders oomblikke waarvan hulle kan getuig: Die Here het my kom opsoek! Hoekom doen Hy dit? Somtyds is dit omdat Hy ons wil kom bemoedig; ander kere vermaan Hy ons om die regte pad te loop; soms het Hy vir ons 'n spesiale taak, soos in die geval van Elia.

Dalk is jy op hierdie stadium van jou lewe besig om van die Here af weg te hardloop vanweë ongehoorsaamheid, vrees of sonde. "Wat maak jy hier?" geld dalk ook baie spesifiek vandag vir jou. Onthou dan dat die nuwe dag met sy geleenthede vir jou wink. Maak 'n regsomkeer as die koers van jou lewe nie reg is nie. Verander jou gesindheid en jou aanslag as dit nodig is. Hou op om vir jouself jammer te wees, en kyk na die sil­hoeët van die Man van Nasaret wat in jou plek krom geloop het onder die gewig van 'n kruis sodat jy kan regop loop.

Vanweë die verkeerde dinge in ons verlede; soms as gevolg van die feit dat ons al so dikwels beledig is of seergekry het; partykeer omdat ons be­sig was — met sonde — of steeds is, is ons soos Adam en Eva of Elia — ons kruip vir die Here weg. Ons is skaam of wil Hom nie sien nie.

Geen mens kan egter vir die Here wegkruip nie. Los wat agter is en gryp na wat voorlê. Ontwikkel die potensiaal wat die Here in jou gelê het. Loop die pad waarop Hy jou wil stuur!

Oordenking - Luister na die stem agter jou

Liewe Vyfhoek-gelowige

Lees gerus hierdie oordenking.

Luister na die stem agter jou

Wanneer jy die regte koers verlaat, sal jy agter jou 'n stem hoor sê: "Hier is die pad, loop hierlangs." (Jes. 30:21)

Jy het waarskynlik ook al die ervaring gehad dat iemand se naam skielik baie helder in jou gedagtes opkom. Dis of 'n mens 'n gedrongenheid ervaar om daardie persoon te besoek. In die geroesemoes van die dag waai die naam egter weer by die venter uit, en jy kom nooit by daardie persoon uit nie. Ek het net hierdie week weer so 'n ervaring gehad, maar toe nooit by die betrokke persoon uitgekom nie. Gister loop ek horn raak, en sê toe ewe skuldig: "Ek het gister so baie aan jou gedink, maar toe nooit daar uitgekom nie."

"Dis jammer," antwoord hy, "ek het regtig 'n behoefte daaraan gehad. Die groot, donker hand uit my verlede het my weer stewig in sy greep ge­had!"

Wat ons nie besef nie, is dat die Heilige Gees soms so met ons werk. Wees dus sensitief vir die leiding van die Heilige Gees in jou lewe. Sorg dat die antenna van jou gees fyn ingestel bly op die hemelse sendstasie van die Heilige Gees. Luister dan na die influisteringe van die Gees sodat jou persoonlikheid al meer die van die Here Jesus sal word. Laat toe dat die Heilige Gees sy salwing op die wonde van jou verlede uitgiet, sodat jou môres anders kan wees as jou gisters. Gehoorsaam Hom wanneer Hy op 'n sagte manier 'n opdrag in jou gedagtes en hart lê.

Hoe meer jy jouself oopstel vir die werking van die Gees van God, na sy stem luister en Hom gehoorsaam, hoe duideliker sal die beeld van die Here Jesus terselfdertyd in jou lewe sigbaar word.