Liewe Vyfhoek-gelowige
Lees gerus hierdie oordenking en bepeins die vraag aan die einde.
HOE LIEF HET EK U
WOORD
Geseënd is die een wat die
woorde van hierdie profesie lees, en die mense wat dit hoor en wat ter harte
neem wat daarin geskrywe staan, want die eindtyd is naby. (Op. 1:3)
Toe
Johannes die Openbaringboek geskryf het, het hy geweet dat hy sommer baie
bevoorreg was om vir 'n wyle in die beheersentrum van die heelal, God se
troonsaal, te kon ingaan. Boonop kon hy ook nog sien hoedat Christus
uiteindelik met al die bose magte afreken. Hierna het God hom toegelaat om al
sy ervaringe op skrif te stel en dit met ander mense te deel. Daarom skryf
Johannes in hoofstuk 1:3 dat die lesers baie geseënd is om al hierdie woorde te
mag lees. Dit bied immers ook aan hulle die geleentheid om God se troos te mag
ervaar, maar ook om hulle lewe in orde te kry voordat dit te laat is.
Tot
vandag toe word ons ook die geleentheid gebied om Openbaring, asook al die
ander Bybelboeke, te mag lees. God sê dat dit 'n onuitspreeklike groot voorreg
is; so 'n groot voorreg dat Hy ons selfs as geseëndes beskryf. Maar daar is tog
'n voorwaarde hieraan verbonde. Johannes sê dat ons alles ter harte moet neem
wat ons lees. Ons kan die Bybel nie maar haastig lees en dit daarna toeslaan en
aangaan met ons lewe asof niks gebeur het nie. Nee, ons moet dit diep in ons
hart wegbêre sodat ons ons lewe daarvolgens kan inrig. Dan is ons presies op
die plek waar God ons wil hê. Want dan kan sy Gees die Bybelse ink-en-papier-woorde
met sy eie hand op ons hart oorskryf.
Beskou
God jou ook as een van die geseëndes omdat jy sy Woord met jou hele hart
liefhet? Leef jy ook vir daardie oomblikke dat jy die Bybel of een of ander
geestelike boek kan lees? So nie, moet jy eenvoudig begin om tyd hiervoor te
maak. Dit is deur en deur die moeite werd.
No comments:
Post a Comment