Oordenking - As jy alles verloor het

Liewe Vyfhoek-gelowige

Lees gerus hierdie oordenking.

As jy alles verloor het

Hy luister na die gebed van die wat alles verloor het, Hy sal hulle gebed nie verag nie. (Ps. 102:18)

Palm 102 is 'n gebed van 'n hulpelose wanneer dit met hom sleg gaan en hy sy klagte uitstort voor die Here. Iemand is hier aan die woord wat alles verloor het. Voor hom bly daar niks meer oor nie. Die digter van Psalm 102 toon al die tipiese simptome van depressie: hy het alle eetlus verloor, hy het geweldig gewig verloor, hy voel hom eensaam en verlate en hy stort elke dag emmers trane. Dit voel selfs vir hom of die Here hom wegge­gooi het.

Herken jy jouself in hierdie psalm? Sommige mense ly só erg aan depres­sie dat hulle selfdood as die enigste uitweg sien. Soos Jona, toe sy kom­kommerplant verwelk het, wil hulle vir die Here vra: "Laat ek nou maar sterf, Here, want dit is vir my beter om te sterf as om te lewe" (vgl. Jona 4:8). Het jy miskien ook al só gedink? Het jy selfs al verder gevorder as Jona en 'n poging aangewend om self 'n einde aan jou lewe te maak? Om dit te doen, gaan niks aan jou probleme verander nie, want jou lewe hou nie hier op nie. As jy in God glo, gaan jy eendag in die hemel by Hom wees!

Oordenking - Moedeloosheid is onnodig

Liewe Vyfhoek-gelowige

Lees gerus hierdie oordenking.

Moedeloosheid is onnodig

Om hierdie rede word ons nie moedeloos nie. Al is ons uiterlik besig om te vergaan, innerlik word ons van dag tot dag vernuwe. Ons swaarkry in hierdie lewe is maar gering en gaan verby, maar dit loop vir ons uit op 'n heerlikheid wat alles verreweg oortref en wat ewig bly. (2 Kor. 4:16-17)

'n Tydelike siekte is baie makliker om mee saam te leef as 'n kroniese een. As ons weet dat iets 'n end gaan kry, is dit baie makliker om te ver­werk as 'n stuk moeilikheid waarvan die einde nie in sig is nie, en wat vir ons lyk of dit vir altyd sal aanhou. In so 'n geval is die versoeking groot om in depressie te verval.

As daar 'n probleem in jou lewe is wat al baie lank aanhou, as jy herhaal­delik daaroor gebid het en nog nie 'n antwoord gekry het nie, kan jy gerus vandag na Paulus luister: niks hou vir altyd aan nie — nie jou huidige stres­vlak of depressie nie, ook nie jou probleme en krisisse nie. Hierdie dinge sal weer verbygaan — al voel dit vandag vir jou of jy nie 'n tree verder kan nie, probeer dus nog 'n rukkie vasbyt dalk is jou probleem waaroor jy op die oomblik so gespanne is, môre al iets van die verlede.

Wanneer dit baie sleg met jou gaan, kan jy God se beloftes vir jou in sy Woord weer 'n slag onderstreep. En onthou altyd om op te kyk na God, in plaas van rondom jou na jou probleme.

Alhoewel dit nou vir jou mag voel of jy nooit weer hierdie gevoel van nutteloosheid en hopeloosheid wat dreig om jou te oorweldig, sal kan af­skud nie, vertrou op God. Jou swaarkry van die oomblik is net tydelik, en eendag sal dit vir jou uitloop op 'n heerlikheid wat alles verreweg oortref en wat ewig is, soos ons teksvers beloof. Jy kan jou pyn en seerkry, jou angs en spanning dus nog 'n rukkie uithou, omdat jy die versekering het dat dit nie vir altyd sal aanhou nie.

Oordenking - Waarheen jaag jy?

Liewe Vyfhoek-gelowige

Lees gerus hierdie oordenking.

Waarheen jaag jy?

Moet oor niks besorg wees nie, maar maak in alles julle begeertes deur gebed en smeking en met danksegging aan God bekend. En die vrede van God wat alle verstand te bowe gaan, sal oor julle harte en gedagtes die wag hou in Christus Jesus. (Fil. 4:6-7)

Een van die oorsake van stres is dat jy jouself totaal ooreis omdat daar nog so baie materiële dinge is wat jy graag wil hê. Jy plaas dus dag na dag onnodige druk op jouself, omdat jy, soos die meeste van jou vriendinne, modern wil aantrek, jou kinders na eksklusiewe skole wil stuur en allerlei luukse dinge in jou huis wil hê. Jy werk oortyd omdat jy nóg beter vir jou gesin wil sorg, omdat jy 'n nuwe luukse motor wil koop of jou vrou op 'n oorsese reis wil neem. En omdat jy in hierdie werkdoolhof beland het, raak jy by die dag meer ooreis en gespanne.

Wil jy nie weer gaan dink of al hierdie dinge waarvoor jy jou so afsloof werklik die moeite — en die stres — werd is nie? Ware rykdom lê nie in die dinge wat jy besit nie. Daar is so baie goeie dinge wat God vir jou gee wat nie met geld gekoop kan word nie: jou gesin, jou gesondheid, jou lewe, jou talente, jou werk. Die dinge wat jy reeds het, is tien teen een baie kos­baarder as al die dinge wat jy begeer en waarvoor jy so hard werk.

Miskien het dit tyd geword dat jy jou prioriteite sal regkry. Dat jy die belangrikste dinge eerste sal stel. Dit is nie nodig om so te jaag na die din­ge wat op die ou end nie ewigheidswaarde het nie. Die Here weet watter dinge jy regtig nodig het. Hy belowe in sy Woord dat Hy vir jou sal sorg. Jy hóéf dus nie oor enigiets bekommerd te wees nie. Omskep eerder daardie dinge waaroor jy jou so bekommer in gebede. Dan sal jy ontdek dat God vir jou sy vrede wat alle verstand te bowe gaan in jou lewe sal gee. En vrede en stres kan nooit gelyk in een mens heers nie.

Oordenking - ‘n Feeslewe kan joune wees

Liewe Vyfhoek-gelowige

Lees gerus hierdie oordenking.

‘n Feeslewe kan joune wees

Dit gaan altyd sleg met 'n bedrukte mens; die blymoedige mens se hele lewe is 'n fees. (Spr. 15:15)

Miskien is vandag se teksvers die allerlaaste ding wat jy wil hoor as jy moedeloos en depressief is. Daar is alreeds baie mense wat aanhou om vir jou te sê dat alles vir jou goed sal uitwerk of dat elke donker wolk 'n sil­wer randjie het. En dit terwyl jy net donkerte voor jou kan sien, terwyl jou selfbeeld by die minuut krimp, terwyl al waarvoor jy op die oomblik lus is, is om jou kop soos 'n volstruis in die sand in te druk.

Miskien het dit tog tyd geword dat jy weer sal leer om te lag. Om al die snaakse dinge om jou raak te sien en te geniet. Hoe die wêreld vir jou lyk, hang baie daarvan af met watter oë jy na die wêreld kyk. Om te lag is vir jou medisyne — gratis medisyne wat jou net goed kan doen, en 'n gesonder mens van jou sal maak.

'n Oosterse wysgeer het duisende jare tevore al gesê: 'n Mens is wat jy dink. Wil jy nie probeer om van vandag af 'n doelbewuste poging aan te wend om meer te lag en positief te dink nie? As jy sal onderneem om van nou af spesiaal op te let na alles wat 'n glimlag werd is, sal jy weldra ont­dek dat jy so effens beter voel. Vra vir die Here om al daardie negatiewe gedagtes wat so gedurig op jou afstorm, gevange te neem en dit aan Christus gehoorsaam te maak (vgl. 2 Kor. 10:5). En jy sal sien: kort voor lank gaan jy nie meer kromgetrek deur neerslagtigheid deur die lewe gaan nie, binne­kort gaan die lewe weer vir jou 'n fees wees! Is jy bereid om die medisyne te probeer?

Oordenking - As jou voete wil gly

Liewe Vyfhoek-gelowige

Lees gerus hierdie oordenking.

As jou voete wil gly

Toe ek gedink het my voete gly, het u troue liefde my regop gehou, Here. Toe ek met baiee onrus in my binneste sit, het u vertroosting my tot rus gebring. (Ps. 94:18, 19)

Alles is nie altyd negatief nie. 'n Geringe mate van stres is selfs wenslik omdat dit jou op jou tone hou en in die hoogste versnelling laat funksioneer. Maar wanneer dinge handuit ruk en dit voel of jy nie langer in beheer is nie, kan jou stresvlak tot 'n onwenslike hoogte styg.

Een van die belangrikste oorsake van stres is juis dat mense beheer oor hulle omstandighede verloor. Dan word hulle gespanne en onrustig, dan "sit hulle met baie onrus in hulle binneste" soos die psalmis dit so raak in ons teksvers beskryf. Hulle kan net nie meer byhou nie, en in 'n despera­te poging om dit desondanks reg te kry, raak hulle al hoe meer agter en al hoe angstiger. Dan voel dit of hulle voete onder hulle uitgly, of hulle nie langer op eie houtjie staande kan bly nie.

Is vandag vir jou so 'n voeteglydag? Gelukkig het jy Iemand aan wie jy kan vashou. Iemand wat altyd daar is vir jou, wat jou baie liefhet. God se vertroosting en liefde kan ook jou spanning ontlont. Alhoewel jou geloof nie al jou probleme soos mis voor die son sal laat verdwyn nie, sal Hy vir jou die insig gee om daardie probleme op 'n positiewe manier te hanteer, sodat jy uiteindelik geestelik veel ryker anderkant gaan uitkom.

Wanneer jy weer gespanne is of depressief voel, lees gerus hierdie psalm sommer 'n paar keer oor. Tien teen een sal jou spanningsimptome verdwyn — nie omdat jou omstandighede verander of jou werklas verminder het nie, maar omdat jy vir God as jou Trooster ontdek het.

Oordenking - is jy binne-in die put?

Liewe Vyfhoek-gelowige

Lees gerus hierdie oordenking.

Is jy binne-in die put?

Ek het gesmag na die hulp van die Here. Hy het na my toe afgebuig ... Hy het my uitgetrek uit die put van die dood, my op 'n rots laat staan. (Ps. 40:1-3)

As jy vandag voel asof jy saam met Job op die ashoop sit, asof jy saam met Dawid in 'n put van neerslagtigheid vasgevang is, skep moed: jy is sommer in goeie geselskap. Baie van die bekendste profete en Godsmanne van die Ou Testament het aan presies dieselfde siekte as jy gely! Mense soos Elia, Job, Dawid en Jona het by tye selfs vir die Here gevra om 'n einde aan hulle lewe te maak omdat hulle nie langer kans gesien het om voort te gaan nie. Ook Jesus moes baie swaarkry hier op aarde deurmaak.

Voel jy vandag asof God ver is? Gaan kyk wat doen Dawid met sy aan­valle van depressie: hy onthou hoe die Here horn in die verlede gehelp het, en hy glo dat Hy dit weer sal doen. Hy vra God om hom uit die put van die dood te trek en hom weer op vaste grond te laat loop. Kyk ook na wat God doen: God antwoord die gebed van Dawid. Hy verlos hom nie net van sy neerslagtigheid nie, Hy gee vir hom weer vreugde in sy lewe. Daarom is daar soveel psalms wat aan die begin 'n kreet van moedeloosheid is, en op 'n jubelnoot eindig.

As jy die depressiewolke oor jou voel saampak, as jy bang en benoud raak, as jy gespanne en angstig is, moenie langer bly vaskyk teen jou nega­tiewe gemoedstoestand en oorweldigende probleme nie word stil voor God. Hy kan en wil jou graag help. Hy is die God wat sy bang, depressiewe kinders se voete weer op 'n rots wil plaas. Hy kan ook vir jou, soos vir Da­wid, 'n nuwe lied in die mond gee, sodat jy vir ander mense daarvan kan vertel en hulle op hulle beurt vir God die eer kan toebring.

Oordenking - Jou verantwoordelikheid

Liewe Vyfhoek-gelowige

Lees gerus hierdie oordenking.

Jou verantwoordelikheid!

Julle moet julle met eerbied en ontsag daarop toelê om as verloste mense te lewe. (Fil. 2:12)

Daar is baie dinge wat in 'n mens se verlede lê en wat jou ontwikkeling kan belemmer. Die Bybel het vir ons op verskillende maniere raad oor hoe 'n mens sekere dinge kan oorkom, en hoe jy ander dinge kan bereik.

Een ding is duidelik: ek en jy het 'n persoonlike verantwoor­delikheid. In die teksgedeelte sê Paulus dat ons ons met eerbied en ontsag daarop moet toelê om as verloste mense te lewe. Ons maak dikwels die fout dat ons reken as 'n mens in die oggend Bybel ge­lees het en gebid het, jy reg is vir die dag wat voorlê. Dit is waar dat die Bybel die atmosfeer in 'n mens se gemoed stel. Paulus beklemtoon egter dat 'n mens se verantwoordelikheid nie daarmee ophou nie.

Dit is dikwels so dat ons gehoorsaam so lank as wat ons geestelike leiers in sig is. Dit is mos nou maar net eenvoudig makliker as iemand jou herinner aan wat jy behoort te doen en wat nie. Persoonlike verantwoorde­likheid hou egter nooit op nie. Juis wanneer 'n mens alleen is, moet jy jou aandag voluit op Christus rig, sodat jy nie op 'n dwaalspoor gebring word nie. Jou lewe moet te alle tye wys dat jy 'n verloste Christen is.

Hou dan ook op om negatiewe ervarings uit jou verlede soos swaar blokke met jou saam te sleep. Hou op om jammer te wees vir jouself en ander mense te verwyt. Neem ook jou geestelike verantwoordelikheid op en lê jou met eerbied en ontsag daarop toe om as 'n verloste mens te lewe. Niemand anders gaan dit vir jou doen nie.

Koester hierdie versekering in jou hart: God het deur sy Gees in jou hart kom woning maak om sy beloftes aan jou te laat waar word. Jy is dus nie alleen nie. Die Here is by jou deur sy Gees. Hy stel jou in staat om as 'n verloste mens te lewe — ook op hierdie dag wat voor jou uitstrek.

Oordenking - Gooi jou laste af

Liewe Vyfhoek-gelowige

Lees gerus hierdie oordenking.

Gooi jou laste af

Terwyl ons dan so 'n groot skare geloofsgetuies rondom ons het, laat ons elke las van ons afgooi, ook die sonde wat ons so maklik verstrik, en laat ons die wedloop wat vir ons voorlê, met volharding hardloop, die oog gevestig op Jesus ... (Heb. 12:1,2)

In Hebreërs 11 wys die skrywer vir ons 'n hele galery geloofshelde. Hy wil egter die aandag op die Here, wat op so 'n wonderlike manier in hulle lewe gewerk het, vestig. In Hebreërs 12 kom die skrywer nou met 'n kragtige oproep. Hy vergelyk die lewe met 'n atletiekwedloop. Sy bedoeling is om te sê dat ons moet volhard in die geloof. Ons moet die voorgeslagte se geloof en geduld navolg.

Daar kan dus geen twyfel wees nie: geloof en volharding gaan saam. Stel jou net die stadion met die volgepakte pawiljoene voor. Die geloofshelde wat in hoofstuk 11 genoem is, sit almal daar. Hulle is nie alleen 'n geweldige groot getal nie, hulle vorm 'n eenheid. En hulle getuienis is eenstemmig: "Ons het die wedloop met volharding gehardloop en dit met eer voltooi deurdat ons enduit gelowig volgehou het!"

Dit is ook wat van ons verwag word. Ons moet die wedloop wat voorlê met volharding hardloop, sodat ons die wenstreep kan bereik.

Daar is egter twee basiese vereistes: Ons moet onbelemmerd kan hardloop en ons moet 'n vaste mikpunt hê. Daarom moet ons elke las afgooi wat ons kan verhinder om die wenstreep te bereik. Veral die sonde, sê die Hebreërskrywer. En ons vaste mikpunt is: Jesus, die Begin en Voleinder van die geloof.

Wat is die dinge wat jou verhinder om voluit die wedloop van die ge­loof te hardloop? Is dit 'n skewe selfbeeld, 'n persoonlikheid wat nie geba­lanseerd ontwikkel het nie, of dinge in die verlede wat jou terughou? Gooi dan hierdie laste af. Span jou in met alle krag, en vestig jou oog op Jesus Christus. Wil jy nie sommer vandag daarmee begin nie?