Oordenking - Vol met vrede en blydskap

Liewe Vyfhoek-gelowige

Lees gerus hierdie oordenking.

Vol met vrede en blydskap

Mag God, die bron van hoop, julle deur julle geloof met alle vreugde en vrede vervul, sodat julle hoop al hoe sterker kan word deur die krag van die Heilige Gees! (Rom. 15:13)

Ons leef in 'n tyd waar die woorde: "Dit gaan goed", nie te veel gebruik word nie. En waar mense dit wel gebruik, kom jy in elk geval na 'n rukkie in hulle geselskap agter dat hulle dit nie te ernstig bedoel nie, aangesien hulle ook maar steen en been kla oor al die swaarkry wat die lewe na hul­le kant toe aangee.

Iemand wat God se groot genade in sy lewe ontdek het, is iemand wat egter 'n ander dimensie van die lewe leer ken het, en dit is dat hulle in­nerlike mens, of hulle binnekant, of hulle hart, of hoe jy dit ook al wil noem, onder splinternuwe bestuur staan. Hulle weet met ander woorde dat hulle onder die beheer van die lewende God is wat hulle van binne af volgemaak het met sy Heilige Gees. En hierdie wete maak mos die wêreldse verskil. Dit maak die verskil tussen 'n lewe wat vol vrede en rustigheid is en 'n lewe wat teen duiselingwekkende snelhede van die een leë plesier na die volgende voortjaag op soek na sin en betekenis.

Ongelukkig veroorsaak die gejaagde lewe dat baie Christene vandag hierdie innerlike dimensie van hulle lewe verwaarloos sodat hulle op die ou end eintlik ook maar net so aan die ronddobber is soos al die ongelowiges rondom hulle. Paulus bid daarom baie ernstig in Romeine 15:13 dat gelowi­ges God se seën in hulle hart sal ervaar. Wanneer ek en jy ook begin om hierdie gebed gereeld saam met hom te bid, dan raak ons lewe inderdaad al hoe voller, nie met mismoedigheid en bitterheid nie, maar juis met God se vrede. Is dit nie 'n wonderlike wete dat God wil hê dat ons moet deel in sy eie blydskap en vrede nie. Hy wil juis hê dat ons reeds hier op aarde iets van sy eie Persoon in ons hart sal ervaar.

Oordenking - Vol met vrede en blydskap

Liewe Vyfhoek-gelowige

Lees gerus hierdie oordenking.

Vol met vrede en blydskap

Mag God, die bron van hoop, julle deur julle geloof met alle vreugde en vrede vervul, sodat julle hoop al hoe sterker kan word deur die krag van die Heilige Gees! (Rom. 15:13)

Ons leef in 'n tyd waar die woorde: "Dit gaan goed", nie te veel gebruik word nie. En waar mense dit wel gebruik, kom jy in elk geval na 'n rukkie in hulle geselskap agter dat hulle dit nie te ernstig bedoel nie, aangesien hulle ook maar steen en been kla oor al die swaarkry wat die lewe na hul­le kant toe aangee.

Iemand wat God se groot genade in sy lewe ontdek het, is iemand wat egter 'n ander dimensie van die lewe leer ken het, en dit is dat hulle in­nerlike mens, of hulle binnekant, of hulle hart, of hoe jy dit ook al wil noem, onder splinternuwe bestuur staan. Hulle weet met ander woorde dat hulle onder die beheer van die lewende God is wat hulle van binne of volgemaak het met sy Heilige Gees. En hierdie wete maak mos die wêreldse verskil. Dit maak die verskil tussen 'n lewe wat vol vrede en rustigheid is en 'n lewe wat teen duiselingwekkende snelhede van die een leë plesier na die volgende voortjaag op soek na sin en betekenis.

Ongelukkig veroorsaak die gejaagde lewe dat baie Christene vandag hierdie innerlike dimensie van hulle lewe verwaarloos sodat hulle op die ou end eintlik ook maar net so aan die ronddobber is soos al die ongelowiges rondom hulle. Paulus bid daarom baie ernstig in Romeine 15:13 dat gelowi­ges God se seën in hulle hart sal ervaar. Wanneer ek en jy ook begin om hierdie gebed gereeld saam met hom te bid, dan raak ons lewe inderdaad al hoe voller nie met mismoedigheid en bitterheid nie, maar juis met God se vrede. Is dit nie 'n wonderlike wete dat God wil hê dat ons moet deel in sy eie blydskap en vrede nie. Hy wil juis hê dat ons reeds hier op aarde iets van sy eie Persoon in ons hart sal ervaar.

Oordenking - lid van die koninklike familie

Liewe Vyfhoek-gelowige

Lees gerus hierdie oordenking.

Lid van die koninklike familie

En omdat ons kinders is, is ons ook erfgename. Ons is erfgename van God, erfgename saam met Christus ... (Rom. 8:17)

Kinders van 'n koning geniet voorregte wat gewone mense nie het nie, soos hoë aansien en status. Boonop deel hulle ook nog in die koning se mag en beskerming. Dieselfde geld ook vir Christene. Ons dien immers die Koning van die ganse heelal en die Here van alle here.

As koningskinders het ons vier en twintig uur per dag 'n verbindingslyn met God se hemelse troonsaal. Boonop het ons ook nog toegang tot die skatkamers van sy liefde, genade en beskerming. Deur gebed kan ons in 'n oogwink die afstand tussen hemel en aarde oorsteek en ons behoeftes aan sy voete gaan neerlê. By God is daar immers geen besetkodes vir ge­bede wat opreg na Hom toe kom nie. Daarom hoef ons nie soos kerkmuise of soos 'n klompie geestelike boemelaars te lewe nie. Nee, ons is God se eie bloedgekoopte kinders, en daarom ook sy erfgename.

By ons hemelse Vader erf ons nou reeds alles wat ons nodig het om el­ke dag soos koningskinders te lewe. Ons het byvoorbeeld nou reeds deel aan sy Gees, aan sy vryspraak, sy vrede en sy liefde. Ons is ook nou reeds oorwinnaars oor die sonde en ons weet ook dat die dood nie meer soos 'n wrede monster aan die einde van ons lewe vir ons staan en wag nie. Want ons het mos by Christus die ewige lewe as erfporsie gekry.

Terwyl ons partykeer na die Here se seën soek in dinge soos finansiële voorspoed, sukses en tydelike geluk, verbeur ons inderwaarheid sy heel grootste seën. Ons besef nie aldag dat ons reeds in God se paleis bly nie, bekleë met koningsklere wat spierwit gewas is deur die bloedrooi bloed van ons Heiland. Daarom kla ons oor klein dingetjies terwyl ons eintlik geestelike miljoenêrs is, mense wie se naam in God se eie testament as erfgename opgeskrywe staan.

Oordenking - Splinternuut

Liewe Vyfhoek-gelowige

Lees gerus hierdie oordenking.

Splinternuut

lemand wat aan Christus behoort, is 'n nuwe mens. Die oue is verby, die nuwe het gekom. (2 Kor: 5:17)

Grimeermiddels lewer meestal net tydelike resultate op. Wanneer 'n vrou haar lipstiffie in die oggend aansit, weet sy maar alte goed dat sy hierdie oefening nog 'n keer of wat deur die loop van die dag sal moet herhaal as sy op haar beste wil bly lyk. Selfs die duurste kosmetiese ware hou maar net vir 'n kort tydjie.

Christus bring gelukkig nie net 'n paar kosmetiese veranderings aan wanneer Hy ons die slag kom nuutmaak nie. Nee, Hy kom maak ons heeltemal oor. En boonop hou Hy sy handewerke vir altyd in stand. Hy herskep ons tot 'n splinternuwe skepping, tot 'n nuwe wêreld in die kleine. In hierdie proses haal Hy ons ou, klipharde hart uit en plant 'n nuwe hart in die plek daarvan in wat ontvanklik is vir die werk van sy Gees.

Wat 'n heugelike dag as ek ontdek dat ek 'n herskepte mens is; dat my lewe onder nuwe bestuur staan omdat ek in Jesus glo. Hoe heerlik om te mag agterkom dat Christus my ou self saam met Horn laat kruisig en be­grawe het en dat ek ook saam met Hom uit die dood opgewek is. En dat ek boonop ook nog mag weet dat ek nou 'n hemelse burger is en dat my naam in die hemelse boeke aan die kredietkant, of as jy wil: aan die red­dingskant, met Jesus se eie bloed ingeskryf staan.

As mens die dag met Jesus Christus paaie gekruis het, is niks daarna ooit weer dieselfde nie. Dan verander alles. Dan stap jy van hierdie ont­moeting af weg as 'n nuwe mens met nuwe belangstellings en nuwe prio­riteite. Dan is jy waarlik 'n geseënde. Maar die belangrikste van alles: dan is jy iemand met die ewigheid as eindbestemming. Dan is jy op koers na die wenpaal toe, na jou permanente tuiste in jou vaderland in die hemel.

Oordenking - Waar dit die meeste saak maak

Liewe Vyfhoek-gelowige

Lees gerus hierdie oordenking.

Waar dit die meeste saakmaak

Kyk watter groot liefde die Vader aan ons bewys het: Hy noem ons kinders van God, en ons is dit ook (1 Joh. 3:1)

Tel jou seëninge een vir een, maar begin op die regte plek!

Daar verloop selde 'n gesprek onder Christene waar hierdie saak nie op een of ander manier aangeroer word nie. Ten spyte van al ons baie woorde oor God se seën, verstaan ons dit nie noodwendig almal op dieselfde ma­nier nie. Vir een persoon beteken seën die afwesigheid van probleme, ter­wyl dit vir 'n ander persoon weer op een of ander geluk dui wat  hy of sy te beurt geval het. 'n Ander sal dit weer aan 'n gebedsverhoring verbind.

Ten spyte van al die uiteenlopende opvattinge oor God se seën, bedoel die meeste mense minstens hiermee dat Hy iets goeds vir hulle gedoen het. Seën beteken dus dat jy in God se goeie boekies is; dat Hy nie rugkant eerste na jou toe staan nie. Maar dit is dikwels vir mense maar net 'n ty­delike gebeurtenis. Solank as wat dit reën, of solank as wat jy gesond is, is jy geseënd. Verdwyn hierdie dinge egter, dan verdwyn God se seën ook soos mis voor die son. Maar is dit waar? Is God se seën net afhanklik van ons menslike definisies daarvan?

Die Bybel sê natuurlik baie dinge oor hierdie saak. Maar die heel belang­rikste ding wat dit oor God se seën sê, is dat jy eers waarlik 'n geseënde is as jy die dag vir God as jou Vader ken. As jy glo dat Hy die kwaaivriendskap tussen jou en Hom vir altyd uit die weg geruim het omdat Christus in jou plek gesterf het, dan het jy deel aan die heel grootste seën wat God ooit aan 'n mens kan bewys. Want dan ken jy die heel belangrikste Persoon in die heelal op so 'n persoonlike vlak dat jy selfs vir Hom mag sê: "My Va­der." En boonop weet jy dat Hy dan sal terug antwoord: "My kind."

Die Here seën mens op baie maniere. Maar die belangrikste seën wat God ooit aan jou kan skenk, is die voorreg om lewenslank in sy teenwoor­digheid te mag deurbring. Beskou jy ook hierdie seën as die heel grootste geskenk wat jy nog ooit in jou lewe ontvang het?

Oordenking - God is liefde

Liewe Vyfhoek-gelowige

Lees gerus hierdie oordenking.

God se liefde

Hierin is God se liefde vir ons geopenbaar: sy enigste Seun het Hy na die wêreld toe gestuur sodat ons deur Hom die lewe kan hê. (1 Joh. 4:9)

“Julle sê dat God liefde is. Ek sien ongelukkig niks daarvan rondom my nie. Wat ek wel sien, is dood, haat en trane.” So het 'n ateïs op 'n keer oor God geskryf. Hy het die Christendom verwyt vir al hulle gepraat oor God se liefde, terwyl hy geen bewyse hiervan in ons deurmekaar wêreld kon vind nie.

Miskien het jy ook al gewonder hoekom God se liefde dan so wegge­steek word agter al die hartseer en ellende rondom ons. Is Hy regtig 'n God van liefde soos wat Hy sê? Ja, sê die Bybel op hierdie vraag, 'n duisend maal ja. Maar dan moet ons God se liefde reg verstaan. Dan moet ons dit verstaan soos wat Hy dit aan ons kom wys het:

God se liefde het vir Jesus van sy hemelse troon laat opstaan. God se liefde het Jesus slaweklere laat aantrek en Hom hiervoor bekroon met 'n kroon van houtdorings in plaas van 'n kroon van goud en diaman­te. God se liefde het veroorsaak dat Hy vir Jesus soos 'n vervloekte aan die kruis behandel het; Hom laat doodgaan het onder die gewig van ons almal se sondes sodat ons nooit weer hieroor gestraf sal word nie.

En dan vra mense nog so ewe of God regtig liefde is; Hy wat die hemele geskeur het, Hy wat die hoogste offer denkbaar betaal het sodat ons en Hy vir altyd vriende mag wees? Miskien verstaan ons nie meer wat God se liefde is nie omdat ons op al die verkeerde plekke hierna soek. Dalk moet ons weer ter harte neem wat Johannes in 1 Johannes 4:10 hieroor sê: Werklike liefde is dit: nie die liefde wat ons vir God het nie, maar die liefde wat Hy aan ons bewys het deur sy Seun te stuur as versoening vir ons sondes.

Jy is voorwaar gelukkig as jy iets van God se liefde gesnap het.

Oordenking - Bemoedig mekaar

Liewe Vyfhoek-gelowige

Lees gerus hierdie oordenking.

Bemoedig mekaar

In elke moeilikheid bemoedig Hy ons. Daarom kan ons ook ander bemoe­dig wat in allerlei moeilikhede verkeer. Ons kan hulle bemoedig met die­selfde bemoediging waarmee God ons bemoedig ... (2 Kor. 1:4-5)

Een van die mees positiewe gevolge van depressie en stres, is die empatie en verstaan wat jy daardeur wen. Omdat jy presies weet hoe dit voel om sielsmoedeloos en depressief te wees, om daglank in hoogspanning te lewe, om te ervaar dat jy dinge hoegenaamd nie kan hanteer nie, sal jy na so 'n ervaring ook presies weet hoe om die hand uit te steek na hulle wat op die oomblik in dieselfde toestand verkeer. Omdat jy self daar was, kan jy nou ander help. En juis dit is die heel beste raad teen depressie.

Omdat jy bekend is met die simptome van stres en depressie, is jy ook in staat om hierdie simptome baie gou by ander mense te bemerk. Moet dan nie huiwer nie, bied jou hulp aan. Ander mense het jou nodig, al is hulle huiwerig om by jou om hulp aan te klop. Verseker daardie persoon van die dinge wat jy graag wou hoor toe jy bang en depressief was: dat jy hom liefhet en aanvaar net soos hy is, dat hy vir God kosbaar is, dat God by hom is en hom deur hierdie heersende krisis wil dra. Bied jou onder­skraging en vriendskap vir hom aan. En op 'n dag sal jy ontdek dat daardie persoon weer nuwe hoop vir die toekoms het.

“Daar vloei werklik baie seëninge uit die beproewings van die lewe vir hulle wat daardeur geoefen word,” skryf Esperance Kelber. “Een van die belangrikste is seker 'n hart wat vir ander voel. “As jou stres en depressie wat jy moes verduur daartoe gelei het dat jy 'n hart vir ander ontwikkel het, kan jy nou vir die Here daarvoor dankie sê”!

Oordenking - Jy mag maar hoop

Liewe Vyfhoek-gelowige

Lees gerus hierdie oordenking.

Jy mag maar hoop

Ons is immers gered en ons het nou hierdie hoop. Wat 'n mens al sien, hoop jy tog nie meer nie. Wie hoop nog op wat hy reeds sien? Maar as ons hoop op wat ons nie sien nie, wag ons daarop met volharding. (Rom. 8:2425)

lemand wat aan depressie ly, staan nie net negatief teenoor homself nie, maar ook teenoor sy toekoms. Vir hom lyk dit of sy lewe nooit weer ge­lukkig of sinvol sal wees nie. Na die dood van sy vrou was die Engelse skrywer C.S. Lewis baie depressief. "Ek sien vir niks kans nie," skryf hy in hierdie stadium. "Om te skryf, selfs om 'n brief te lees, lyk vir my na 'n inspanning wat bo my mag is. Selfs om te skeer. Wat maak dit tog saak of my wange glad of vol stoppels is? Ek kan nou goed verstaan waarom 'n alleen­mens so maklik slordig word en homself afskeep. Waarom sal hy tog al die moeite doen?" (Uit: A Grief Observed.)

As jy jou met Lewis kan vereenselwig, as die toekoms vir jou ook uit­sigloos en sonder hoop voor jou uitstrek, moet jy besef dat jy tyd nodig het om jou huidige krisis te verwerk. In hierdie verwerkingsproses is dit be­langrik dat jy weer hoop in die lewe sal kry.

Om te hoop beteken nie dat jy die dinge waarop jy hoop nou reeds sal kan sien en ervaar nie. Hoop beteken juis dat jy sal glo in die dinge wat jy nie kan sien nie, dat jy God op sy Woord sal neem en aan elkeen van sy beloftes sal vashou, dat God self die bron van jou hoop sal wees. Jy mag maar hoop dat die hemel vir jou na hierdie swaarkry sal wag, omdat God dit vir jou in sy Woord belowe. Jou aardse lewe duur maar 'n kort rukkie, en daarom kan jou swaarkry ook nie vir altyd aanhou nie. Jy kan nog 'n rukkie uithou, omdat die Bybel jou verseker dat geen ondervinding ooit vir jou tevergeefs is nie, maar dat alles uiteindelik tot jou beswil saamwerk.

Oordenking - Op God se skoot

Liewe Vyfhoek-gelowige

Lees gerus hierdie oordenking.

Op God se skoot

Geen versoeking as wat meer is as wat ‘n mens kan weerstaan, het julle oorval nie. God is getrou. Hy sal nie toelaat dat julle bo julle kragte versoek word nie; as die versoeking kom, sal Hy ook die uitkoms gee, sodat julle dit kan weerstaan. (1 Kor 10:13)

Voel jy op die oomblik asof jy gedaan gespartel is? Het jy vir weke lank tevergeefs probeer om self jou probleme op te los, om self alles wat op jou wag, gedoen te kry, om self verantwoordelikheid te aanvaar vir alles wat in jou lewe verkeerd geloop het? Dan het dit vir jou tyd geword om boedel oor te gee. Tyd dat jy laat los en vir God toelaat om weer orde te skep uit die warboel waarin jou lewe op die oomblik verkeer.

Daar is net een plek waar 'n bang, onrustige kleuter rustig word, en dit is in die omarming op die skoot van haar ma.

Eien dus die belofte in Jesaja 66 vir jou persoonlik toe: So sê die Here: Ek laat vrede na haar toe aankom sons 'n rivier, Ek laat die rykdom van die nasies na haar toe stroom. hulle sal ... op haar skoot getroetel word. Soos 'n moeder haar kind laat veilig voel, so laat Ek julle veilig voel (Jes. 66:12-13).

Wanneer jou eie kragte opraak, is God se geweldige krag tot jou beskik­king. Hy wil jou graag help. Op God se skoot, in die sirkel van sy ewige arms, kan jy al jou stres, al die oorsake van jou depressie, al jou vrese en bekommernis agter jou laat, want daar is jy volkome veilig. Vir altyd.

Oordenking - Leer jou kind stres hanteer

Liewe Vyfhoek-gelowige

Lees gerus hierdie oordenking.

Leer jou kind stres hanteer

Gee leiding aan 'n jongmens oor hoe hy moet beef, en hy sal ook as hy al oud is nie daarvan afwyk nie. (Spr. 22:6)

Moderne kinders word aan baie meer stres blootgestel as vroeër. Van kleins af is kinders se programme oorvol, en van jongs af word hulle aan geweldige groepsdruk blootgestel. Veral as jou kind nie 'n uitblinker is nie, kan dit baie spanning veroorsaak wanneer hy swakker presteer as sy maats. As ouer behoort jy 'n ogie te hou oor die stresvlak van jou kind. Meer nog, jy behoort jou kind van jongs af te leer om 'n goeie selfbeeld te ontwikkel en hoe om stres te hanteer. Probeer veral om spanningsimptome by jou kind op 'n vroeë stadium raak te sien.

Dit is baie belangrik dat jou kind te alle tye sal weet dat jy hom onvoor­waardelik liefhet en vertrou, maar dat jy hom ook sal dissiplineer. Dit is net so belangrik dat jy beskikbaar sal wees vir jou kind, dat jy tyd sal maak om met hom te praat en na hom te luister. Wanneer jou kind ervaar dat jy werklik in sy doen en late belangstel, sal hy met vrymoedigheid sy probleme met jou bespreek.

Wanneer kinders besef dat hulle ouers hulle onvoorwaardelik liefhet, sal dit vir hulle makliker wees om stres in hulle eie lewe te hanteer en tot gebalanseerde, vervulde volwassenes te ontwikkel.

Wys jou kind dat jy hom liefhet. Hou hom vas en gee hom gereeld 'n drukkie. Leer jou kind van kleins af om die Here lief te hê. As jyself dan die liefde van Christus rondom jou kind uitleef, sal hy heel waarskynlik ook vir God lief wees, en ook as hy ouer is, die Bybelse riglyne gehoorsaam. Dit is oor en oor bewys dat mense wat vir God gekies het, die beste in staat is om stres en depressie positief te hanteer.

Oordenking - Teleurstellings op jou pad

Liewe Vyfhoek-gelowige

Lees gerus hierdie oordenking.

Teleurstellings op jou pad

" ... As ons die goeie van God aanvaar; moet ons nie ook die slegte aan­vaar nie?" (Job 2:10)

Daar kom teleurstellings op elke mens se pad. Nie een van ons kan hulle vryspring nie. “Jy moet eens en vir altyd ophou om jou oor jou suksesse en mislukkings te bekommer,” skryf die Russiese romanskrywer Tsjechof. “Doen net jou plig en gaan elke dag doelgerig voort. Wees voorbereid op mislukkings, hulle is onvermydelik.”

Alhoewel mislukkings deel van elke mens se lewe is, is hulle nogtans moeilik om te verwerk, en kan hulle jou gefrustreerd, mistroostig en soms woedend maak. Miskien het jy kort tevore 'n liefdesteleurstelling ervaar, miskien het jou kind nie sy universiteitsjaar deurgekom nie, miskien het jy uitgevind dat jou man 'n buite-egtelike verhouding het, en nou voel dit vir jou of jou wêreldjie in duie gestort het. Hierdie teleurstelling wat jy nie verwag het nie, laat jou stresvlak die hoogte inskiet. Jy het nog altyd gedink dat sulke dinge met ander mense gebeur, nie met jou nie — en nou is jy platgeslaan deur die pyn daarvan.

Daar is nie verniet 'n spreekwoord wat lui dat ons teleurstellings baie­maal God se bestellings is nie. Na 'n lang tyd verloop het, sal jy ontdek dat daardie teleurstelling waaroor jy nou so gespanne en depressief is, selfs goed was vir jou. Want God gebruik soms teleurstellings om sy kinders weer afhanklik van Hom te maak.

Aanvaar dus die teleurstellings en mislukkings in jou lewe. Daar is altyd vir jou 'n kans om weer te probeer. En onthou dat daar een plek is waar jy nooit, ooit teleurgestel kan word nie. Gaan onderstreep gerus1 Petrus 2:6 in jou Bybel: “Kyk, Ek lê in Sion 'n hoekklip, uitverkies vir die ereplek. Wie in Hom glo, word nooit teleurgestel nie.”

Oordenking - In God se arms

Liewe Vyfhoek-gelowige

Lees gerus hierdie oordenking.

In God se arms

"... Moenie bang wees nie, moenie vir hulle skrik nie. Julle het in die woestyn ondervind hoe die Here jullle God julle die hele pad ... gedra het soos 'n man sy seun dra.'" (Deut. 1:29, 31)

Sommige stories is so holrug gery dat 'n mens huiwer om hulle hoege­naamd te gebruik, tog bly hulle so lewenswaar dat jy hulle nie kan uitlaat nie. Almal ken sekerlik die storie van die man wat saam met God langs die strand gestap het en twee rye voetspore in die sand gesien het. Syne en God s'n. Maar op sommige plekke, juis wanneer hy in 'n krisissituasie verkeer het, was daar net een ry spore. "Waar was U dan toe dit so moeilik met my gegaan het?" wou die man van God weet. "Daardie tye het Ek jou gedra," was God se antwoord.

God is vandag nog daar vir sy kinders. Wanneer hulle in krisisse kom, hoef hulle nie bang te word of te skrik nie, omdat God belowe om hulle deur daardie krisisse te dra. As daar dinge in die toekoms op jou wag waarvoor jy hoegenaamd nie kans sien nie, kan jy op God vertrou. Hy on­derneem dat Hy ook vir jou deur daardie probleme sal dra soos wat Hy lank gelede sy volk deur die woestyn gedra het. God wil ook vir jou dra as daar woestyndae vir jou voorlê. Hy wil graag vir jou 'n hulp wees.

"Geen troos is sterker as die sekerheid dat jy midde-in jou nood deur die liefde van God omsluit word nie," skryf die kerkvader Calvyn. Partykeer verander God nie dadelik jou omstandighede nie, maar gee Hy jou die wysheid om die krisis te hanteer en te verwerk. Vertrou Hom om dit te doen, en jy sal ontdek dat wanneer jy jou krisissituasie met God se hulp een dag op 'n slag hanteer, dit glad nie so erg is as wat jy gevrees het nie.

Oordenking - Jy is kosbaar vir God

Liewe Vyfhoek-gelowige

Lees gerus hierdie oordenking.

Jy is kosbaar vir God

Omdat jy vir My kosbaar is, omdat Ek jou hoog ag en jou liefhet, gee Ek mense in jou plek, volke in ruil vir jou lewe. (Jes. 43:4)

'n Mens wat aan spanning ly of depressief is, het gewoonlik ook 'n negatie­we selfbeeld. Hy sien homself as 'n mislukking. Hy worstel met skuldge­voelens en woede — hy is seker dat hy vir niks meer goed is nie, en dat niemand hom liefhet of in hom belangstel nie — ook nie God nie.

As jy op die oomblik sulke negatiewe gevoelens beleef, is dit baie be­langrik dat jy weereens sal besef dat God jou liefhet en aanvaar net soos jy is. En al kan jy op die oomblik nie aan 'n enkele mens dink wat jou onvoor­waardelik liefhet nie, is God nog daar vir jou. Presies hoe kosbaar jy vir Hom is, kan jy in Jesaja 43 se eerste elf verse gaan lees: God het jou ge­maak, Hy het jou op jou naam geroep, jy behoort aan Hom. Hy is bereid om mense in jou plek te gee, volke in ruil vir jou lewe. Hy verseker jou dat Hy by jou sal wees as jy deur water moet gaan, dat riviere jou nie sal wegspoel nie, dat vuur jou nie sal skroei nie. Hy het jou na sy beeld ge­skape, staan daar in Genesis 1:27. Hy het jou net 'n bietjie minder as 'n hemelse wese gemaak en jou met eer en aansien gekroon, sê die digter in Psalm 8:6. En, die onomstootlikste bewys van almal: Hy het sy Seun gegee om aan 'n kruis te sterf, sodat jou sondes vergewe kan word.

Vir God is jy dus baie belangrik, alhoewel Hy groot en almagtig en jy klein en nietig is. Hy het jou spesiaal gekies om sy kind te wees. Wanneer jy weer voel dat jy minderwaardig is, dat jy nie raakgesien en waardeer word nie, onthou hoe kosbaar jy vir God is. En dit is mos onmoontlik om depressief te bly as God jou so liefhet!

Oordenking - Wag op die Here

Liewe Vyfhoek-gelowige

Lees gerus hierdie oordenking.

Wag op die Here

Ek stel my vertroue in die Here, ek vertrou op Hom, ek wag op die ver­vulling van sy woord. Ek wag op die Here meer as wat die wagte op die môre wag ... (Ps. 130:5-6)

Baie mense word in hierdie tye van werkloosheid en werkskaarste ge­dwing om lang ure te werk, om hulle vakansies ter syde te stel, om 'n hoë mate van stres by die werk te hanteer, net omdat hulle vrees dat hulle hulle werk sal verloor as hulle dit nie doen nie. Ander werk weer ure oor­tyd omdat hulle die hoogste sport van die leer in 'n rekordtyd wil bereik. Die gevolg van hierdie werkstres is dat gesinne verwaarloos word, huwe­liksprobleme kop uitsteek en mense in die hospitaal beland.

God kom vra nooit van jou die onmoontlike nie. Dit is nie sy wil dat jy jou moet ooreis nie. Gebruik jou geleenthede soos wat hulle hulle voor­doen, en moenie jou stresvlak opstoot omdat jy die onmoontlike wil vermag nie. Miskien bring jy juis op die oomblik jou dae in angs en bekommernis deur omdat jy die Here nie genoeg kan vertrou nie.

Dit is waar dat paniek en vertroue nie bymekaar hoort nie. As jy op die oomblik met paniek worstel, probeer om liewer op die Here te vertrou, wag rustig op Hom — op sy eie tyd sal Hy vir jou oplossings vir jou probleme gee. Maar let mooi op die voorwaarde: dan moet jy bereid wees om jou gespannendheid te laat staan, om kalm te word in sy teenwoordigheid, om vreedsaam op Hom te wag dat Hy op sy regte tyd die beloftes in sy Woord sal waar maak.

Oordenking - God is in beheer

Liewe Vyfhoek-gelowige

Lees gerus hierdie oordenking.

GOD IS IN BEHEER

Hy is die Een op wie jy jou lewe lank kan vertrou. Die kosbare besitting wat werklik kan help, is wysheid en kennis; die rykdom waarop Sion hom kan verlaat, is die diens van die Here. (les. 33:6)

Wat sal jy doen as jou vierjarige spruit die nag deurhuil omdat hy bang is dat julle volgende week nie genoeg kos sal hê om te eet nie? Sekerlik half lag kry vir die lawwe klein patroon, maar hom ook verseker dat sy vrese ongegrond is. En tog, is dit nie presies wat ons doen wanneer ons so gespanne is oor die toekoms van ons land nie?

Daar heers op die oomblik 'n gees van ongekende angs en onsekerheid in Suid-Afrika. Selfs Christene is pessimisties oor wat in die toekoms vir ons voorlê. En dit is so onnodig. Die meeste van ons is gespanne oor die heersende geweld en onrus — alhoewel ons goed weet dat God in beheer is.

Dit is waar dat jy nie weet wat vir jou in die toekoms wag nie. Jou ergste vrese mag selfs bewaarheid word. Maar as jy aan God behoort hoef jy nie bang te wees nie. As jy gewillig is om in Hom te bly glo, om elke dag meer afhanklik van Hom te lewe, sal jy ontdek dat Hy vir jou nie net in die toekoms sal onderneem nie, maar ook jou huidige angs en depressie sal wegneem.

Net soos in die tyd toe Jesaja geleef het, is God vandag nog die enigste Een op wie ons kan vertrou. God wil vandag vir jou sy kennis en wysheid kom aanbied, sodat jy probleemsituasies wat in die toekoms op jou mag wag met sy hulp sal kan hanteer. Maar daar is 'n voorwaarde aan hierdie hulp verbonde: op jou beurt moet jy onderneem om Hom getrou te dien. Is jy bereid daartoe?

Oordenking - Wie se guns soek jy?

Liewe Vyfhoek-gelowige

Lees gerus hierdie oordenking.

Wie se guns soek jy?

…soek ek die guns van God? Probeer ek by mense in die guns kom? As ek nog steeds die guns van mense soek, sou ek geen dienaar van Christus wees nie. (Gal 1:10)

Een van die hoof oorsake van stres is die gevoel dat jy nie langer opgewasse is teen jou omstandighede is nie. Wat probeer jy regkry deur geduring van een plek na ‘n ander te hardloop? Wil jy graag God se guns hierdeur probeer wen, of dié van mense? In ‘n gemeenskap of gemeente is dit byna altyd so dat dié mense wat die besigste is, altyd vir nog meer werk kans sien. Is jy een van hierdie werkholiste? Hou op om jou te bekommer oor wat mense van jou dink – en hou eweneens op om jou af te sloof omdat mense te hoë verwagtinge van jou koester. Wat verwag die Here van jou?

Nou is dit so dat sommige van ons altyd eerste aanbied om te help. As ek dit nie doen nie, gaan niemand nie – het ek al baie maal gedink, en myself onnodig oorlaai. “As ek iets nié kan doen nie, het jy dit swaar,” het iemand altyd gesê, “maar as jy iets goed kan doen, het jy dit bitter!”

As jy ook een van daardie mense is wat altyd aanbied om nog iets by jou reeds vol program te voeg, word gerus ‘n rukkie stil en dink wie jy nou eintlik probeer plesier. Onthou as jou dae so vol is met werk wat moet klaarkom, is daar atyd iets wat afgeskeep word. Gewoonlik is hierdie “iets” jou stiltetyd. Dit is selfs moontlik dat jy so besig kan raak met die dinge van God dat jy nie meer tyd het vir die God van die dinge nie.

Leer ken dus jou eie beperkinge en leer om “nee” te sê. Besluit waar jy kan besnoei sodat jy weer ‘n slag genoeg tyd vir God sal hê. Want per slot van rekening is dit baie belangriker dat jy Hóm sal plesier as vir mense.

Oordenking - "n Getuie op jou siekbed

Liewe Vyfhoek-gelowige

Lees gerus hierdie oordenking.

‘n Getuie op jou siekbed

Toe Jesus dit hoor, het Hy gesê: “Hierdie siekte sal nie op die dood uitloop nie, maar op die openbaring van die wonderbaarlike mag van God, sodat die Seun van God daardeur verheerlik kan word.” (Joh 11:3)

Siekte is een van die dinge wat spanning die hoogte kan laat inskiet. Veral as jy bekommerd is dat die simptome wat jy op die oomblik ondervind dalk maar net die punt van die ysberg is.

As Maria en Marta se broer, Lasarus, ernstig siek word, is die eerste ding wat hulle doen om vir Jesus daarvan te laat weet. Maar wat doen Jesus? In plaas daarvan dat Hy sy vriende te hulp snel, wag Hy totdat Lasarus reeds vier dae dood is, voordat Hy by Marta en Maria se huis in Betanië opdaag. Ek is seker dat die twee susters die baie moeilik gevind het om hierdie onverstaanbare optrede van die Jesus te verwerk. Hulle het goed geweet dat Hy hulle liefhet, en tog laat Hy toe dat hulle broer sterf sonder dat Hy ‘n vinger verroer om te help.

Maar Jesus het ‘n goddelike doel hiermee gehad: deur Lasarus se dood wil Hy sy mag oor die dood bevestig. So sou Hy aan God baie meer eer gee as wanneer Hy hom net gesond sou maak.

Soms bring die Here siekte en dood oor jou pad. Dinge wat jou stresvlak verhoog, onverstaanbare dinge wat jy met jou menslike verstand nie kan verwerk of begryp nie. Maar as jy ten spyte van hierdie dinge in jou lewe dit kan regkry om op God te bly hoop, om Hom onvoorwaardelik te vertrou, sal Hy ook in jou siekte en seerkry sy mag openbaar, sodat die mense wat jou sien, versterk sal word en Hom sal verheerlik. So kan jy selfs op jou siekbed ‘n stralende getuie van sy heerlikheid wees. Sal jy probeer om dit te doen?